За што звольнілі з універсітэта маладога журналіста

17.07.2007. Тэгі: санкцыі, перасьлед, кантрактная сістэма.
Крыніца: Радыё "Рацыя".

Сяргей Падсасонны некалькі год працаваў у Гомельскім дзяржаўным унівэрсітэце імя Скарыны на кафедры рускай і сусветнай літаратуры. Кантракт у яго скончыўся ў ліпені, а новае кіраўніцтва навучальнай установы новы заключаць не стала.

Ніхто не патлумачыў маладому супрацоўніку прычынаў гэтага. Але фармальна заканадаўства не парушана.

Сяргей Падсасонны звязвае звальненне са сваёй дзейнасцю ў якасці незалежнага журналіста. Маладзён актыўна супрацоўнічаў з парталам Gomelsapience.com. На гэтай інтэрнэт-старонцы амаль няма палітыкі, аднак гэта непадкантрольны ўладзе інфармацыйны рэсурс. Апрача таго, Падсасонны наведваў адукацыйныя мерапрыемствы для журналістаў, у тым ліку за мяжой.

Звольніць маладзёна спрабавалі яшчэ год таму, аднак за яго ўступіліся студэнты. Тады спадара Падсасоннага перавялі на паўстаўкі.

Летась увосень у маладога чалавека адбыліся нефармальныя гутаркі як з кіраўніцтвам унівэрсітэта, так і з “людзьмі ў цывільным”. Сяргею Падсасоннаму празрыста намякалі, што ягоныя праблемы могуць знікнуць, калі ён пачне супрацоўнічаць з чэкістамі і стане іхнім інфарматарам. Аднак малады журналіст адмовіўся ад гэтай прапановы.