У Магілёве былі моцна збітыя актывісты мясцовай суполкі “Моладзі БНФ”.

29.10.2007. Тэгі: моладзь БНФ, рэпрэсіі.
Крыніца: Радыё "Рацыя".

Прыблізна а палове на першую гадзіну намеснік старшыні магілёўскай арганізацыі Аляксандар Анісімаў і яго паплечнік Кастусь Яўсееў праз тэлефон прызначылі сустрэчу сваім сябрам ды выправіліся ў прызначанае месца. Але на выхадзе з пад’езду хлопцаў без аніякіх прычынаў пачалі збіваць невядомыя. Нападнікаў было каля 7 чалавек, прыблізна 25-гадовага ўзросту. Адзінае, што запомнілі юнакі, – гэта іх аднолькава стрыжаныя патыліцы.

Цікава, што хуліганы стараліся не біць хлопцаў па твары, а больш цэлілі па нырках. У хлопцаў не адабралі ні мабільных тэлефонаў, ні грошай. Затое на развітанне адзін з нападнікаў “пад страхам смерці” забараніў хлопцам звяртацца ў міліцыю. У дадзены момант юнакі раяцца з праваабаронцамі наконт таго, што рабіць далей.