У Бабруйску для сустрэчы з Мілінкевічам памяшканьняў няма

04.02.2008. Тэгі: грамадскія арганізацыі, Рух За Свабоду, адмова.

Бабруйскія актывісты “Руху “За свабоду” атрымалі адказ з гарвыканкама наконт прадастаўленьня памяшканьня для правядзеньня сустрэчы з лідэрам Руху “За Свабоду” Аляксандрам Мілінкевічам. Мерапрыемства было запланаванае на 9 лютага.

У лісьце, падпісаным першым намеснікам Бабруйскага гарвыканкама М. Кавалевічам, паведамляецца аб адмове прадставіць памяшканьне для сустрэчы з Мілінкевічам у Доме мастацтваў на падставе таго, што у гэты дзень, у суботу, тут запланавана іншае мерапрыемства.

Мясцовыя праваабаронцы лічаць гэты адказ адпіскай, а рашэньне ўладаў палітычна матываваным, паколькі ў Доме мастацтваў – некалькі памяшканьняў, якія прыдатныя для правядзеньня сустрэчы з дэмакратычным лідэрам.