У Баранавічах міліцыя і амон заблакавалі цэнтральную плошчу

11.02.2008. Тэгі: акцыі, прадпрымальнікі, забарона.

Сёньня ў Баранавічах праходзіць акцыя прадпрымальнікаў, якія пратэстуюць супраць прэзыдэнцкага ўказу №760. Больш за 200 прадпрымальнікаў, актывістаў грамадскіх рухаў і партый, сабраліся у гарадскім парку, нягледзячы на адмову гарадскіх уладаў у правядзеньні акцыі пратэсту.

Перад самым пачаткам акцыі міліцыя затрымала маладафронтаўцаў Яраслава Грышчэню і і Вадзіма Бевеню. Цяпер яны знаходзяцца ў міліцыі, дзе на іх складаюць пратаколы.

Як паведамляе баранавіцкі праваабаронца Сяргей Гоўша, прадпрымальнікі накіраваліся на цэнтральную плошчу горада, каб сустрэцца з прадстаўнікамі улады. Аднак падыходы да будынка райвыканкама перакрыла міліцыя ў колькасьці 40 чалавек. Неўзабаве з’явіліся аўтобусы з амапаўцамі, якія ўшчыльную заблакавалі цэнтральную плошчу Баранавічаў.