У Гомелі адключылі трансляцыю недзяржаўных тэлеканалаў

26.02.2008. Тэгі: злоўжываньні, свабода слова, незалежныя СМІ.
Крыніца: Прэс-служба БАЖ.

Сёння ў 14.00 у Гомелі адключылі трансляцыю так званага «сацыяльнага пакету телеканалаў», а таксама кабельнага тэлебачання. Зроблена гэта без папярэджання, хаця звычайна абвесткі пра змены ў вяшчальнай сетцы падаюцца на бягучай стужцы тэлеканалу «Нірэя» — адзінага тэлеканалу, перадачы якога робяцца непасрэдна ў Гомелі без умяшання ў сетку яго вяшчання з Мінску.

Мясцовыя журналісты звязваюць гэтыя падзеі з тым, што ўлады апасаюцца з`яўлення ў выпусках навінаў небеларускіх тэлеканалаў рэпартажаў пра часовае вызваленне Аляксандра Казуліна, якога адпусцілі на пахаванне жонкі Ірыны. Пакуль невядома, зроблена гэта па ініцыятыве мясцовай «вертыкалі» альбо па ўказанні з Мiнску.

Па стане на 16.00 тэлетрансляцыі па-ранейшаму не было.