Вызваленага ад крымінальнай адказнасьці Аляксандра Крутога гвалтоўна накіравалі ў псіхіятрычную лякарню

12.03.2008. Тэгі: затрыманьні, перасьлед, псіхіятрыя.

3 сакавіка Аляксандр Круты выправіўся ў нясвіжскую паліклініку, каб стаць на ўлік. Аднак тут яго перастрэлі супрацоўнікі міліцыі і ў той жа дзень прымусова адвезлі ў Рэспубліканскую псіхіятрычную клініку ў Навінках.

Як стала вядома ПЦ “Вясна”, сваёй згоды на аказаньне псіхіятрычнай дапамогі Аляксандр Круты не даваў. У адпаведнасьці ж з Законам аб псіхіятрычнай дапамозе РБ, змяшчэньне ў псіхіятрычную лякарню магчыма толькі са згоды грамадзяніна, або ў выпадку, калі яго дзеяньні ўяўляюць небяспеку ўласнаму здароўю ці здароўю іншых грамадзян. У дадзеным выпадку, дзеяньні нясвіжскай міліцыі неправамоцныя, таму сваякі Аляксандра Крутога рыхтуюцца абскарджваць іх у судзе.

Нагадаем, што судовая калегія па крымінальных справах Мінскага абласнога суда адмяніла пастанову суда Нясвіжскага раёна па абвінавачваньню Аляксандра Крутога ў публічнай абразе прэзідэнта Беларусі, адмяніла прымусовае накіраваньне на псіхіятрычнае лячэньне і вытворчасьць па ягонай справе.