У.Навумаў не дазволіць апазіцыі прайсці сваім маршрутам у Дзень Волі

25.03.2008. Тэгі: акцыі, забарона, Дзень Волі.
Крыніца: Интерфакс.

Міністр унутраных спраў Беларусі Уладзімір Навумаў заявіў, што праваахоўныя органы будуць перарываць акцыю апазіцыі, калі яна не будзе адпавядаць зацверджанаму ўладамі маршруту.

- Мы як заўсёды скіраваныя да самых-самых мірных і канструктыўных дзеянняў. Ад ступені іх парушэнняў удзельнікамі акцыі будзе залежыць нашая рэакцыя, - заявіў, адказваючы на пытанне "Інтэрфакса", кіраўнік беларускага МУС.

- Вядома, сёння будзе задзейнічана больш сілаў і сродкаў, - адзначыў У.Навумаў.

Як раней паведамлялася, гарадскія ўлады Мінска дазволілі заяўнікам правесці 25 сакавіка марш да 90-годдзя БНР па пэўным маршруце руху ад Акадэміі навук да Бангалора.

Арганізатары адмовіліся ісці па дазволенаму ўладамі Мінска маршруту і заклікалі сваіх прыхільнікаў падчас маршу наведаць шэраг гістарычных месцаў горада.