Жыткавічы: міліцыя затрымала Аляксандра Бандзюка

28.03.2008. Тэгі: затрыманьні, дэмакратычны актывіст.
Крыніца: Радыё «Свабода».

Сёньня раніцай у Жыткавічах мясцовыя міліцыянты затрымалі актывіста моладзевай арганізацыі “Грамадзянскі форум”Аляксандра Бандзюка. Пра гэта “Свабодзе” паведаміў грамадзкі актывіст з Гомелю Пётр Кузьняцоў.

Кузняцоў: “У Жыткавічах напярэдадні 25 сакавіка былі распаўсюджаныя некаторыя агітацыйныя матэрыялы апазыцыі.Чамусьці міліцыянты лічаць, што гэта зрабіў Аляксандар Бандзюк”.

Са словаў Пятра Кузьняцова, выклік Аляксандра ў міліцыю, магчыма, справакаваны КДБ. Суразмоўца нагадвае, што 20 лютага Бандзюку патэлефанавалі з райваенкамата і запрасілі на сустрэчу. Ваенныя паведамілі, што ім трэба ўдакладніць зьвесткі пра маладога чалавека наконт прызыву.

Аднак пасьля Аляксандар Бандзюк расказаў журналістам, што ў ваенкамаце яго чакаў невядомы, які сказаў, што ён прадстаўляе КДБ. Невядомы паведаміў, што ў Жыткавічах арганізацыя “Грамадзянскі форум” маларазвітая, ёй патрэбна падтрымка, асабліва легальная, і КДБ можа нам дапамагчы - камп’ютэрам і грашыма. Асабіста Аляксандру гэты чалавек прапанаваў аднаўленьне ў Гомельскім унівэрсытэце, з якога ён быў выключаны у 2006 годзе.

Сам Аляксандар Бандзюк катэгарычна адмаўляецца ад якога-небудзь супрацоўніцтва з КДБ.