Суд арыштаваў Паліну Кур’яновіч на 10 сутак

03.04.2008. Тэгі: суды, акцыі, арышт.

Сёньня ў Цэнтральным судзе сталіцы адбылося судовае паседжаньне па справе затрыманай напярэдадні моладзевай актывісткі Паліны Кур'яновіч. Судзьдзя Тацяна Паўлючук прызнала дзяўчыну віноўнай у адміністратыўным правапарушэньні па арт. 23.34 КаАП РБ (Парушэньне парадку арганізацыі і правядзеньня масавых мерапрыемстваў) і вынесла пакараньне ў выглядзе адміністратыўнага арышту тэрмінам на 10 сутак.

Нагадаем, 2 красавіка каля амбасады Расеі моладзевыя актывісты зьбіраліся правесьці пікет, прымаркаваны да Дню яднаньня беларускага і расейскага народу. Як толькі яны разгарнулі бел-чырвона-белы сьцяг і расьцяжку “Расеі – не, Еўропе – так”, прыехалі супрацоўнікі міліцыі на трох машынах і разагналі пікет. Паліна Кур'яновіч і Паліна Дзьякава былі затрыманыя, астатнім удалося зьбегчы. Дзяўчат даставілі ў пастарунак Цэнтральнага РУУСа Менску, дзе склалі адміністратыўныя пратаколы. Паліну Кур'яновіч да суду адвезьлі на Акрэсьціна, а Паліну Дзьякаву, як непаўнагадовую, адпусьцілі праз тры гадзіны. Матэрыялы справы будуць адпраўленыя на адміністратыўную камісіі выканкаму.