“Сьвечка памяці” ў Бярозе

28.04.2008. Тэгі: акцыі, Чарнобыль.

26 красавіка група сябраў палітычных партыяў, НДА і звычайных грамадзянаў (пераважна маладых) г. Бярозы Берасьцейскай вобл. ладзілі ўжо традыцыйную “сьвечку памяці”-гадзіну смутку і жалобы — на гарадзкой плошчы Бярозы, аддаючы такім чынам даніну памяці Чарнобыльскай трагедыі і памяці тых людзей, што заўчасна пайшлі з жыцьця ў выніку Чарнобылю.

Менавіта на гарадзкой плошчы 1 травеня 1986 г. улады праводзілі першамайскую дэманстрацыю (адразу пасьля Чарнобыльскага выбуху). Таму як раз на гэтай плошчы ўжо больш 5 гадоў ладзіцца “сьвечка памяці” — ланцуг людзей з запаленымі сьвечкамі. Мінулыя гады ахоўнікі правапарадку заўсёды прысутнічалі на плошчы, але вынік заўсёды быў “мірны”.

26 красавіка г.г. пасьля гадзіны смутку супрацоўнікамі Бярозаўскага РАУС быў затрыманы і адвезены ў РАУС сябра Партыі БНФ, праваабаронца сп. Сяржук Русецкі, якога яны палічылі арганізатарам несанкцыянаванага пікету. У РАУС на сп. Русецкага быў складзены пратакол аб адміністратыўным правапарушэньні, зь якім той не пагадзіўся, паколькі лічыць, што ніякага пікету ён не арганізоўваў і не праводзіў, таму і дазволу на правядзньне “сьвечкі памяці” ад раённых уладаў не было патрэбна. Канчатковую кропку ў гэтай справе мусіць паставіць суд.