У Полацку затрыманыя актывісты "Маладога Фронту"

12.06.2008. Тэгі: Малады Фронт, адміністратыўная справа, акцыі, затрыманьні.

11 чэрвеня ў Полацку супрацоўнікі міліцыі затрымалі і даставілі ў мясцовы РАУС пяцёх актывістаў Маладога Фронту: Кацярыну Салаўёву, Алеся Круткіна, Мікалая Дземідзенку, Сяржука Каралёнка, Алеся Хаберава. Маладафронтаўцы разгарнулі расьцяжку "STOP-ДЫКТАТУРА" насупраць Полацкага выканкаму.

Аднаму з актывістаў Алесю Хабераву стала дрэнна са здароўем і яго забрала "хуткая дапамога".

На затрыманых актывістаў склалі пратаколы аб адміністрацыйным правапарушэньні па артыкуле 23.34 ч.3 КаАП за ўдзел у несанкцыянаваным пікетаваньні, здзейсненым паўторна. Па гэтай частцы артыкула іх могуць пакараць арыштам да 15 сутак.

Адразу з ізалятара часовага затрыманьня, дзе яны правялі ноч, іх адвязуць у суд. Дакладны час суда пакуль невядомы.