У Бабруйску ад назіральнікаў хаваюць інфармацыю аб тым, калі праходзяць акруговыя камісіі

28.07.2008. Тэгі: выбары-2008, Бабруйск.

- Я некалькі разоў звяртаўся ў акруговую камісію, якая адносіцца да Бабруйскай-Перашамайскай выбарчай акругі, - распавядае назіральнік Віктар Качан. – І па тэлефоне, і неаднаразова прыходзіў туды з прозьбай, каб мне паведамілі, калі будзе паседжаньне камісіі. Кожны раз мне адказвалі, што не могуць гэта зрабіць. Бо паседжаньні, па іх словах, адбываюцца ў працоўным парадку, калі ў іх з’яўляецца неабходнасьць.

Віктар Качан лічыць, што дзеяньне членаў акруговай камісіі – гэта завуаляваная адмова, спроба перашкодзіць незалежным назіральнікам трапляць на паседжаньні. Яшчэ больш ён у гэтым упэўніўся, калі дамаўляўся на сустрэчу са старшынёй Бабруйскай-Першамайскай выбарчай акругі Віктарам Гарбанёвым.

- Мы дамовіліся з ім сустрэцца ў 9.30 раніцы. Але калі я прыйшоў да яго, і спытаў, калі ж будзе чарговае паседжаньне, старшыня адказаў, што яно толькі што скончылася. Гэта можа сьведчыць толькі аб адным, - ён спецыяльна прызначыў мне сустрэчу крыху пазней, каб я не патрапіў на паседжаньне, - мяркуе назіральнік.

“Праваабаронцы за свабодныя выбары”