У Барысаўскім раёне працягваецца датэрміновая агітацыя

29.07.2008. Тэгі: Барысаў, выбары-2008.

У суботнім нумары выканкамаўскай газеты "Адзінства" за 26 ліпеня апублікаваны зварот прэзідыума Барысаўскай раённай арганізацыі ветэранаў у сувязі з падрыхтоўкай і правядзеньнем чарговых выбараў дэпутатаў Палаты прадстаўнікоў Нацыянальнага сходу Рэспублікі Беларусь да ветэранаў, усіх выбаршчыкаў Барысаўскага раёна, які да гэтага ўжо прагучаў па мясцовым радыё.

У звароце ўтрымоўваецца заклік да выбаршчыкаў "прагаласаваць за тых кандыдатаў у дэпутаты, якія выступаюць за курс нашага Прэзідэнта і Урада". Іньшыя кандыдаты апрыёры названыя балбатунамі, "для якіх інтэрасы народа абыякавыя, а дэпутацкія мандаты патрэбныя, каб толькі заявіць аб сваіх палітычных амбіцыях".

Раней газета "Адзінства" і мясцовае радыё пасля афіцыйнай рэгістрацыі ініцыятыўнай групы па вылучэньні кандыдатам у дэпутаты Віктара Гумінскага растыражавалі яго зварот да выбаршчыкаў, у якім дзеючы дэпутат сцьвярджаў, што яго перадвыбарныя абавязаньні выкананыя, хоць падобнае сцьвярджэньне выклікае вялікія сумневы.

"Праваабаронцы за свабодныя выбары"