Праваабаронцу ўчынілі асабісты дагляд на мяжы

30.07.2008. Тэгі: перасьлед, праваабаронцы, выезд за мяжу.

Двойчы за дзень на Гродзенскім чыгуначным вакзале асабістаму дагляду падвяргаўся Віктар Сазонаў, гродзенскі грамадска-палітычны актывіст і праваабаронца.

28 ліпеня Віктар Сазонаў накіроўваўся на Беласточчыну па сваіх асабістых справах. Аднак памежнікі на падставе нейкага спісу накіравалі яго назад да супрацоўнікаў мытні з патрабаваннем правесці дагляд. У выніку цягнік затрымалі амаль на 15 хвілін.

Па вяртанні назад гісторыя паўтарылася. Нічога забароненага Віктар Сазонаў ні туды ні назад з сабой не вёз, а сваё затрыманне тлумачыць палітычным пераследам за актыўны ўдзел у бягучай выбарчай кампаніі і за праваабарончую дзейнасць.

Нагадаем, што на мінулым тыдні Віктар Сазонаў выклікаўся ў мясцовае ўпраўленне КДБ нібыта па справе выбуху ў Мінску 3 ліпеня.

"Праваабаронцы за свабодныя выбары"