Камітэт фінансавых расследаванняў патрабуе дэкларацыі аб даходах

31.07.2008. Тэгі: перасьлед, дэмакратычны актывіст.
Крыніца: Радыё "Рацыя".

Камітэт фінансавых расследаванняў Магілёўcкай вобласці патрабуе ад апазыцыйных прэтэндэнтаў на дэпутацкія мандаты прадставіць дэкларацыі аб даходах. Позвы з'явіцца ў камітэт ў якасці сведкаў атрымалі каля 10 апазыцыйных актывістаў.

Старшыня донарскай няўрадавай арганізацыі “Кропля жыцьця” Ігар Каваленка і старшыня абласной арганізацыі Аб’яднанай Грамадзянскай партыі Ўладзімер Шанцаў ужо наведалі камітэт. Яны павінны падаць дэкларацыі аб даходах за апошнія тры гады да 8 жніўня.

Юры Новікаў, які таксама атрымаў позву з'віцца ў камітэт, пакуль туды не хадзіў і ня ведае, ці пойдзе. Ён тлумачыць РАЦЫІ сваю пазыцыю тым, што ў позве яго выклікаюць у якасці сведкі. Але сведкам можна выступаць толькі па нейкай справе. Новікаў пазваніў у камітэт і высветліў, што ніякай справы не заведзена, а трэба проста запоўніць дэкларацыю.

Узнікае пытанне, навошта ўлады патрабуюць у дэмакратаў запоўненую дэкларацыю, калі прэтэндэнты ў кандыдаты і так павінны яе запаўняць. Юры Новікаў кажа, што магчыма гэта яшчэ адна дробная спроба заторгаць прэтэндэнтаў ад апазыцыі. Да таго ж, усе прэтэндэнты мусяць падаць дэкларацыі да 18 жніўня, а камітэт фінансавых расследванняў патрабуе ад выкліканых да сябе апазыцыянераў - да восьмага. Магчыма, улада хоча больш часу на праверку дакументаў.