Гродзенцы адмаўляюцца ад мізэрных сацыяльных выплат

31.07.2008. Тэгі: грамадства, сацыяльная сфэра.
Крыніца: Радыё "Рацыя".

Гродзенскім уладам не хапае сродкаў на аказанне адраснай дапамогі насельніцтву. Як высветлілася, сродкаў патрабуецца ў некалькі разоў болей чым запланавана.

Памылка гродзенскіх чыноўнікаў, якія дакладна не разлічылі колькі сродкаў будзе патрэбна на аказанне матэрыяльнай дапамогі насельніцтву, у выніку выклікала перапалох у кіраўніцтва горада:запланаваных на год 500 мільёнаў беларускіх рублёў не хапіла нават на паўгады.І гэта пры тым, што прыярытэт у аказанні матэрыяльнай дапамогі аддаецца шматдзетным і няпоўным сем’ям. Што датычыць адзінокіх пенсіянераў, то як сведчыць практыка ўлады пра іх папросту забылі: з 3 тысяч састарэлых людзей дапамогі ад улады дачакаліся толькі 14 чалавек.

Сярэдні памер штомесячнай дапамогі па Гродзенскай вобласці склаў амаль 25 даляраў, а адзіначасовай - 90. Невялікіх сродкаў не хапае для паўнавартаснага жыцця, але ўлады пакуль не могуць прапанаваць болей. Колькасць жыхароў Гарадзеншчыны, якія звярнуліся за дапамогай, перавысіла 9 тысяч чалавек, але далёка не ўсе дапамогу атрымалі: шматлікія бюракратычныя перашкоды з’яўляюцца асноўнай прычынай таго, што многія людзі адмаўляюцца ад мізэрных сацыяльных выплатаў.