Заява Праваабарончага цэнтру “Вясна” з нагоды абвінаваўчага прысуду, вынесенага па крымінальнай справе актывістаў беларускай дэмакратычнай апазіцыі Паўла Севярынца і Міколы Статкевіча

31.05.2005.

31 траўня 2005 г. суд Цэнтральнага раёна г. Мінска вынес абвінаваўчы прысуд па крымінальнай справе супраць актывістаў апазіцыі Паўла Севярынца і Міколы Статкевіча.

Згодна з вынесеным прысудам, палітыкі былі асуджаныя да трох гадоў абмежаваньня волі.

Праваабарончы цэнтр “Вясна” заяўляе рашучы пратэст працягу палітычных рэпрэсіяў у краіне і лічыць вынесены прысуд незаконным і палітычна матываваным. Абвінаваўчы прысуд яшчэ раз яскрава пацьвердзіў адсутнасьць незалежнай судовай улады ў Рэспубліцы Беларусь, дзе суды служаць не мэтам правасуддзя і абароны правоў грамадзянаў, а выконваюць рэпрэсіўныя функцыі аўтарытарнага рэжыму А. Лукашэнкі.

Падчас судовага працэсу Мікола Статкевіч за сваю грамадзянскую пазіцыю быў арыштаваны на 10 сутак зьняволеньня, утрымліваўся ў нялюдзкіх, пагражаючых ягонаму здароўю ўмовах, дастаўляўся у суд пад канвоем, у сувязі з чым быў вымушаны абвясціць галадоўку пратэсту.

Правабарончы цэнтр “Вясна” зьвяртае ўвагу беларускай і міжнароднай грамадзкасьці на тое, што ініцыяваны А. Лукашэнкам рэферэндум 17 кастрычніка 2004 г. меў неканстытуцыйны характар, а ягоныя вынікі былі груба сфальсіфікаваныя.

Праваабарончы цэнтр “Вясна” зьвяртаецца да кіраўнікоў краінаў Еўразьвязу, Рады Еўропы, Еўрапарламенту з заклікам далучыць да сьпісу грамадзянаў Рэспублікі Беларусь, якім быў забаронены ўезд у краіны Еўразьвязу за грубыя парушэньні правоў чалавека ў Беларусі, суддзяў суда Цэнтральнага раёну горада Мінска: Леаніда Ясіновіча, Аляксея Бычко і пракурора Вадзіма Пазьняка – асобаў, якія прыймалі асабісты ўдзел у рэпрэсіях палітычных апанентаў дзеючага рэжыму ў Беларусі.

Прынята Радай Праваабарончага цэнтру “Вясна”

31.05.2005 г.