Затрыманы падазраваны ў дачыненьні да выбуху 4 ліпеня

06.10.2008. Тэгі: выбух 4 ліпеня.
Крыніца: Радыё «Свабода».

Супрацоўнікі міліцыі затрымалі грамадзяніна Беларусі, якога падазраюць у дачыненьні да выбуху 4 ліпеня ў Менску. Гэта 21-гадовы Аляксандр Корык, які да нядаўняга часу працаваў у кампаніі "Уладпрадімпарт".

Ён ураджэнец Бярэзінскага раёна Менскай вобласьці, некаторы час вучыўся ў Менскім дзяржаўным вышэйшым радыётэхнічным каледжы.

Як расказаў БелаПАН Аляксандр Гузаў, сябар затрыманага, з якім яны разам здымалі кватэру, А.Корык сам зьвярнуўся ў міліцыю і паведаміў аб выпадку, які адбыўся зь ім за адзін-два тыдні да падзей на сьвяткаваньні Дня незалежнасьці ў Менску.

Летам А.Корык працаваў у кампаніі "Уладпрадімпарт" (звольніўся ў сярэдзіне верасьня), якая пастаўляе ў Беларусь у тым ліку сок "Садочак", які фігуруе ў справе аб выбуху. Аднойчы, калі А.Корык вяртаўся дадому пасьля выкладкі тавару ў гіпермаркеце "Гіпа", на прыпынку з просьбай закурыць да яго зьвярнуліся невядомыя маладыя людзі, стан якіх ён расцаніў як неадэкватны. Нібыта ў якасьці падзякі за некалькі цыгарэт яны параілі незнаёмцу пакінуць горад, паколькі будуць узрываць Менск. Пра гэта А.Корык распавёў сябру пасьля выбуху 4 ліпеня, а потым у міліцыі.

Пасьля гэтага, паводле слоў А.Гузава, сябра пачалі выклікаць на допыты, а 30 верасьня А.Корыка затрымалі і памясьцілі ў Цэнтар ізаляцыі правапарушальнікаў на вуліцы Акрэсьціна.

Паводле кіраўніка ўпраўленьня інфармацыі і грамадзкіх сувязей ГУУС Менгарвыканкама Аляксандра Ластоўскага, цяпер праводзяцца апэратыўна-сьледчыя мерапрыемствы для ўсталяваньня яго дачыненьня да дадзенага злачынства.