Прадстаўнік “Міжнароднай амністыі” намагаецца сустрэцца з кіраўнікамі сілавых міністэрстваў

24.10.2008. Тэгі: праваабаронцы, сьмяротнае пакараньне, Міжнародная амністыя.

Афіцыйны прадстаўнік праваабарончай арганізацыі “Міжнародная амністыя” (Amnesty International) Хізэр МакГілл наведвае з візітам Беларусь. Пад час візіту яна плануе правесьці шэраг сустрэч з адказнымі супрацоўнікамі Міністэрства унутраных спраў і Мінюста, Вярхоўнага Суда, іншых арганізацый.

Пакуль, як паведаміла МакГілл, чыноўнікі неахвотна йдуць на кантакт. У Вярхоўным Судзе, напрыклад, адмовіліся ад сустрэчы, спаслаўшыся пры гэтым на занятасьць кіраўніцтва. Толькі прадстаўнікі Мінюста і Міністэрства ўнутраных спраў паведамілі, што пытаньне аб сустрэчы ў дадзены момант разглядаецца.

Найперш, міжнародную праваабаронцу цікавіць пытаньне прымяненьня ў судовай практыцы Беларусі сьмяротнага пакараньня і перспектывы яго канчатковай адмены. Нагадаем, што Рэспубліка Беларусь застаецца адзінай еўрапейскай дзяржавай, якая не адмовілася ад прымяненьня сьмяротнага пакараньня.

Хізэр МакГілл плануе таксама наведаць некалькі гарадоў і правесьці сустрэчы з мясцовымі праваабаронцамі.

Дадаць камэнтар

Камэнтары