Супрацоўнікі КДБ прымаюць меры ўзьдзеяньня да актывіста моладзі БНФ

02.11.2006.

На дзень Салідарнасьці 16 красавіка былі затрыманыя сябры моладзі БНФ на аднаго зь якіх – Сяргея Карповіча – пачаўся ўціск з боку КДБ. Так, 19 кастрычніка ў адміністрацыю БДУ патэлефанавалі супрацоўнікі КДБ з патрабаваньнем “прыняць меры ўзьдзеяньня” да студэнта Карповіча. На пытаньне “Якія меры прыняць?” адказу не паступіла.

Працяг гісторыі адбыўся 27 кастрычніка, калі супрацоўнікі КДБ прыйшлі ў БДУ і, зьняўшы Сяргея з пары, прапапанавалі замест яе размову пра апазіцыю. ГБістаў цікавіла мэта акцыі “16”, хто вывесіў расьцяжку на мосьце каля Траецкага прадмесьця, якую ролю Сяргей адыгрывае ў моладзі БНФ, якія падзеі адбываюцца ў моладзі БНФ, ці мае партыя дачыненьне да флэш-мобаў. На разьвітаньне супрацоўнікі КБД узялі ў Сяржука нумар мабільнага тэлефона для “атрыманьня новай інфармацыі”.

Старшыня Моладзі БНФ Алесь Каліта пракамэнтаваў сытуацыю наступным чынам: “Пасьля кожнай спробы уціску на нашых актывістаў, адпаведным спэцаддзелам моладзі складаюцца фотаробаты супрацоўнікаў КДБ, якія на нас ціснуць. Гэтыя фотаробаты надзейна захоўваюцца і у будучым будуць выкарыстоўвацца для правядзеньня адпаведных сьледчых дзеяньняў, таму хачу перадаць ім прывітаньне”.

Дадаць камэнтар

Камэнтары