Грамадскае аб’яднанне “Беларуская асацыяцыя журналістаў” патрабуе выканання заканадаўства аб СМІ супрацоўнікамі праваахоўных органаў

23.03.2007.

У лісце, які БАЖ накіраваў 22 сакавіка міністру ўнутраных спраў Беларусі Уладзіміру Навумаву і начальніку ўпраўлення ўнутраных спраў Мінскага гарвыканкама Анатолю Куляшову, паведамляецца, што, паводле маніторынгу канфліктаў у сферы СМІ, супрацоўнікі міліцыі вельмі часта, “асабліва падчас масавых мерапрыемстваў” парушаюць правы журналістаў.

Журналісцкая праваабарончая арганізацыя нагадвае, што ў адпаведнасці з артыкулам 39 закона “Аб друку і іншых СМІ” журналісты маюць права прысутнічаць на месцы грамадска значных падзей і перадаваць адтуль інфармацыю, у тым ліку рабіць запісы з выкарыстаннем тэхнікі.

“Закон прадастаўляе права журналістам прысутнічаць на месцы правядзення як санкцыянаваных, так і несанкцыянаваных акцый. Пацвярджэннем статусу журналіста служыць адпаведнае пасведчанне, якое можа быць аформлена ў выглядзе бэджа”, – падкрэсліваецца ў звароце да кіраўніцтва праваахоўных органаў.

БАЖ таксама звяртае ўвагу на тое, што, згодна з артыкулам 48 закона аб СМІ, “парушэнне правоў журналістаў і прымушэнне журналіста да адмовы ад распаўсюджання інфармацыі прызнаюцца ўшчамленнем свабоды масавай інфармацыі”. Нагадваецца, што беларускае заканадаўства прадугледжвае за падобныя дзеянні дысцыплінарную, адміністратыўную, крымінальную і іншую адказнасць.

У завяршэнні афіцыйнага ліста да міністра ўнутраных спраў і начальніка сталічнай міліцыі выказана просьба “забяспечыць правядзенне тлумачальнай работы” сярод кіраўніцтва і асабістага саставу супрацоўнікаў міліцыі, каб папярэдзіць парушэнні заканадаўства аб СМІ.

– Патрэба ў такім звароце выкліканая тым, што падчас масавых акцый супрацоўнікі сілавых структур, відаць, не заўжды ўсведамляюць тое, што журналісты таксама на працы. А права выконваюць прафесійныя абавязкі ім гарантуе наша заканадаўства, – патлумачыла неабходнасць ліста старшыня ГА “Беларуская асацыяцыя журналістаў” Жанна Літвіна.

Як зазначыла кіраўнік журналісцкай арганізацыі, “сёння ў беларускіх журналістаў ёсць сумны досвед, калі ім не толькі абмяжоўваюць магчымасці атрымліваць інфармацыю, але і прымяняюць фізічную сілу, затрымліваюць, разбіваюць тэхніку”.

У якасці прыкладу яна прывяла выпадкі збіцця ў мінулым годзе карэспандэнта газеты “Комсомольская правда” в Белоруссии” Алега Улевіча, а таксама затрымання і прыцягнення да адміністратыўнай адказнасці падчас прэзідэнцкай выбарчай кампаніі ў 2006 годзе 45 журналістаў. Некаторыя з іх потым адбывалі пакаранне арыштам да 15 сутак.

– Нельга ствараць перашкоды журналістам, таму што збіраць і даносіць інфармацыю пра любыя падзеі, якія адбываюцца ў краіне, да шырокай грамадскасці – іх службовы абавязак,”— падкрэсліла Жанна Літвіна.

Дадаць камэнтар

Камэнтары