У Магілёве на сем сутак арышіаваны васемнаццацігадовы Максім Азараў

23.03.2007.

Як паведаміў ПЦ "Вясна" магілёўскі праваабаронца Барыс Бухель, сёньня судзьдзя Касьцюк Раман Львовіч Кастрычніцкага райсуду, нягледзячы на супрацьлеглыя паказаньні сьведкаў затрыманьня і саміх міліцыянтаў, прыняў рашэньне па адміністратыўнай справе, складзенай у адносінах да моладзевага актывіста Максіма Азарава: 11-класьнік пакараны 7 суткамі адміністратыўнага арышту.

Барыс Бухель выступаў грамадзкім абаронцам Максіма, ён зьвярнуў увагу суда на сьведчаньні з боку абвінавачаньня. Адзін з тых, які нібыта ўвечары знаходзіўся на месцы затрыманьня на адлегласьці 20 метраў, сказаў, што Максім Азараў падобны на таго "хулігана", які размахваў рукамі і гучна сварыўся. Другі сьведка таксама ў гэтым ня быў упэўнены. Тым ня менш, судзьдзя не прыслухаўся да довадаў абаронцы. "Пастанова ўжо была напісана, гэта цалкам відавочна, а суд - усяго толькі фікцыя," - упэўнены Барыс Бухель.

Дадаць камэнтар

Камэнтары