Амбасада Беларусі ў Літве адмовіла ў візах літоўскім парламентарам, якія зьбіраліся ў Беларусь на мерапрыемствы, прысьвечаныя 20-м угодкам Чарнобыльскай катастрофы

27.04.2006.

Яек паведамила Радыё Свабода, беларускія ўлады не дазволілі прыехаць у краіну тром літоўскім парламентарам - прадстаўнікам кіруючай кааліцыі Скірмантасу Пабедзінскасу і сацыял-дэмакрату Альгірдасу Палецкісу, а таксама Аўдронісу Ажубалісу, прадстаўніку парлямэнцкай апазыцыі і сябру парлямэнцкай групы "За дэмакратычную Беларусь".

Інфармацыйнае агенцтва "Дэльфі" паведаміла, што парлямэнтары зьвярнуліся па візы ў амбасаду Беларусі ў Літве загадзя, два тыдні таму, але дасюль ня мелі ніякага адказу. Толькі сёньня раніцай, перад самым плянаваным ад'ездам яны атрымалі паведамленьне амбасады Беларусі, што ім не дазволяць прыехаць у краіну.

"Напэўна Лукашэнка падумаў, што гэты візыт можа ўплываць на нацыянальную бясьпеку. Паколькі ў Беларусі чакаецца мітынг, напэўна, улады ня жадаюць, каб прадстаўнікі Літвы былі там", -- заявіў парлямэнтар С.Пабедзінскас.

Парлямэнтары з Літвы плянавалі ўдзельнічаць у афіцыйных мітынгах і мерапрыемствах, а таксама ў амбасадзе Літвы ў Менску сустрэцца зь літоўцамі, якія жывуць у Беларусі.

С.Пабедзінскас і А.Ажубаліс былі ў ліку парлямэнтароў, якім не дазволілі прыехаць назіральнікамі на выбары 19 сакавіка без тлумачэньня прычынаў. Гэтым разам амбасада Беларусі ў Літве таксама не паведаміла, на якіх падставах літоўскім дэпутатам адмовілі ў візах.